અમદાવાદ, તા. 29 મે 2026: ગુજરાત પોલીસ મહાનિદેશક ડૉ. કે.એલ.એન. રાવના માર્ગદર્શન હેઠળ સ્ટેટ મોનીટરીંગ સેલ એટલે કે SMC દ્વારા અમદાવાદ શહેરમાં ગેરકાયદે ચાલતા હુક્કાબાર સામે ધડાકેબાજ કાર્યવાહી કરવામાં આવી હતી.

IPL મેચોના બહાને રેસ્ટોરન્ટ અને કેફેની આડમાં નિકોટીનયુક્ત ફ્લેવર સાથે હુક્કાબાર ચલાવાતી હોવાની બાતમીના આધારે SMCની ટીમોએ 29 મે, 2026ના રોજ અમદાવાદના અલગ-અલગ વિસ્તારોમાં દરોડા પાડ્યા હતા.

SMCની ટીમે સાબરમતી વિસ્તારમાં આવેલા VinViks રેસ્ટોરન્ટ, એલિસબ્રિજ ખાતે OLD TCS Lounge & Restaurant અને સિંધુ ભવન રોડ પર આવેલા Lounge Casanova Cafe ખાતે રેડ કરીને ગેરકાયદે હુક્કાબારનો પર્દાફાશ કર્યો હતો.

સાબરમતીના VinViks રેસ્ટોરન્ટમાંથી 13 ગ્રાહકો ઝડપાયા

સાબરમતી વિસ્તારમાં આવેલા VinViks રેસ્ટોરન્ટમાં SMCની ટીમે તપાસ હાથ ધરતા સ્થળ પરથી 13 ગ્રાહકો હુક્કો પીતા ઝડપાયા હતા. અહીંથી 8 હુક્કા, ફ્લેવર બોક્સ અને અન્ય સાધનસામગ્રી સહિત કુલ રૂ. 20,198નો મુદ્દામાલ કબજે કરવામાં આવ્યો હતો.

પોલીસ તપાસમાં રેસ્ટોરન્ટની આડમાં ગ્રાહકોને હુક્કાની સુવિધા આપવામાં આવતી હોવાની વિગતો સામે આવી હતી. સ્થળ પરથી મળેલી સામગ્રીને કબજે કરી આગળની કાયદેસરની કાર્યવાહી શરૂ કરવામાં આવી હતી.

એલિસબ્રિજના OLD TCS Loungeમાંથી 19 હુક્કા અને 100 ફ્લેવર બોક્સ જપ્ત

એલિસબ્રિજ વિસ્તારમાં આવેલા OLD TCS Lounge & Restaurant ખાતે SMCની ટીમે રેડ કરતા મોટા પ્રમાણમાં હુક્કા અને ફ્લેવર બોક્સ મળી આવ્યા હતા. અહીંથી 19 હુક્કા, 100 ફ્લેવર બોક્સ અને અન્ય સામગ્રી મળી કુલ રૂ. 27,950નો મુદ્દામાલ કબજે કરવામાં આવ્યો હતો.

આ સ્થળ પરથી 25 ગ્રાહકો હુક્કો પીતા મળી આવ્યા હતા. SMCની કાર્યવાહી બાદ સ્થળ પર અફરાતફરીનો માહોલ સર્જાયો હતો. પોલીસ દ્વારા સંચાલકો સહિત સંબંધિત લોકો સામે કાર્યવાહી હાથ ધરવામાં આવી હતી.

સિંધુ ભવન રોડના Lounge Casanova Cafeમાંથી 224 ફ્લેવર બોક્સ મળ્યા

થલતેજ વિસ્તારમાં સિંધુ ભવન રોડ પર આવેલા Lounge Casanova Cafe ખાતે પણ SMCની ટીમે કાર્યવાહી કરી હતી. અહીંથી 9 હુક્કા અને 224 ફ્લેવર બોક્સ સહિત કુલ રૂ. 41,355નો મુદ્દામાલ જપ્ત કરવામાં આવ્યો હતો.

આ કેફેમાંથી 9 ગ્રાહકો હુક્કો પીતા ઝડપાયા હતા. રેસ્ટોરન્ટ અને કેફેના નામે યુવાનોને નિકોટીનયુક્ત હુક્કાની લત લગાડવાના આ પ્રકારના ગેરકાયદે ધંધા સામે પોલીસ દ્વારા કડક વલણ અપનાવવામાં આવ્યું છે.

ભાડજના The Vintage Brew Cafeમાં કોઈ શંકાસ્પદ ચીજવસ્તુ મળી નહીં

SMCની ટીમે ભાડજ વિસ્તારમાં આવેલા The Vintage Brew Cafe ખાતે પણ તપાસ હાથ ધરી હતી. જોકે, અહીં તપાસ દરમિયાન કોઈ શંકાસ્પદ ચીજવસ્તુ મળી ન આવતા સોલા હાઈકોર્ટ પોલીસ સ્ટેશનમાં નીલ નોંધ કરવામાં આવી હતી.

આ સમગ્ર કાર્યવાહીમાં SMCની ટીમે અલગ-અલગ સ્થળોએથી કુલ 46થી વધુ ગ્રાહકોને ઝડપી પાડ્યા હતા. સાથે જ હુક્કા, ફ્લેવર બોક્સ અને અન્ય સાધનસામગ્રીનો મુદ્દામાલ કબજે કરવામાં આવ્યો હતો.

ગેરકાયદે હુક્કાબાર ચલાવતા સંચાલકોમાં ફફડાટ

SMCની આ ત્રિપલ એક્શનથી અમદાવાદ શહેરમાં ગેરકાયદે હુક્કાબાર ચલાવતા સંચાલકોમાં ફફડાટ વ્યાપી ગયો છે. IPL અને કેફે કલ્ચરના બહાને યુવાનોને નશાની આદત તરફ ધકેલતા આવા ધંધા સામે પોલીસ હવે વધુ સક્રિય બની છે.

પોલીસે સંબંધિત પોલીસ સ્ટેશનોમાં ગુનાઓ નોંધાવી વધુ તપાસ હાથ ધરી છે. આ ગેરકાયદે હુક્કાબાર કોના સંચાલનમાં ચાલતા હતા, સામગ્રી ક્યાંથી લાવવામાં આવતી હતી અને કેટલા સમયથી આ પ્રવૃત્તિ ચાલી રહી હતી તે દિશામાં પણ તપાસ કરવામાં આવી રહી છે.

પોલીસ સૂત્રોના જણાવ્યા મુજબ, શહેરમાં યુવાનોને નશાની લત લગાડતા અને કાયદાની આડમાં ચાલતા આવા ધંધાઓ સામે આગામી સમયમાં પણ કડક કાર્યવાહી ચાલુ રહેશે.