ભાવનગરમાં ઝેરી ડુપ્લિકેટ દારૂકાંડનો મોટો પર્દાફાશ: 21 સામે ગુનો, 13 ઝડપાયા

ભાવનગરના વરતેજ પોલીસ સ્ટેશન વિસ્તારમાં તા. 18 ઓગસ્ટ 2026ના રોજ નોંધાયેલા અ.મોત નં. 36/2026ની તપાસ દરમિયાન ચોંકાવનારો ખુલાસો થયો છે. તપાસમાં ‘રોયલ સ્ટેગ’ના સ્ટીકરવાળી બોટલમાં મેથેનોલની વધુ માત્રાવાળો ડુપ્લિકેટ દારૂ હોવાના કારણે બનાવ બન્યો હોવાનું સામે આવ્યું છે.

ઘટનાની ગંભીરતાને ધ્યાનમાં લઈ ગુજરાત રાજ્યના ડીજીપી શ્રી જી.એસ. મલિકની સૂચનાથી સ્ટેટ મોનિટરિંગ સેલ (SMC)ને તપાસ સોંપવામાં આવી હતી. એસએમસીના પોલીસ ઇન્સ્પેક્ટર એસ.એમ. જાડેજાએ તપાસ સંભાળી અલગ-અલગ ટીમો બનાવી કાર્યવાહી શરૂ કરી હતી.

21 આરોપીઓ સામે ગંભીર કલમો હેઠળ ગુનો

વરતેજ પોલીસ સ્ટેશનમાં ડુપ્લિકેટ દારૂના બનાવટ અને વેચાણમાં સંડોવાયેલા કુલ 21 આરોપીઓ સામે ભારતીય ન્યાય સંહિતા-2023ની કલમ 105, 123, 61(2), 3(5), 274, 275, 345(3), 349 તેમજ પ્રોહિબિશન એક્ટની વિવિધ કલમો હેઠળ ગુનો નોંધાયો છે.

13 આરોપીઓ ઝડપાયા

એસએમસીની અલગ-અલગ ટીમોએ અત્યાર સુધીમાં 13 આરોપીઓને ડુપ્લિકેટ દારૂની બોટલો, દારૂ બનાવવા માટેના કેમિકલ, કલર, સ્ટીકરો, ઢાંકણાં, સ્ટીકર રોલ તથા પેકિંગ માટેના પુઠા સહિતના મુદ્દામાલ સાથે ઝડપી પાડ્યા છે.

તપાસમાં આ સામગ્રી ટ્રાન્સપોર્ટ મારફતે દેશના અલગ-અલગ સ્થળોએથી મંગાવવામાં આવી હોવાની માહિતી સામે આવી છે. બાકીના આરોપીઓ તથા તપાસમાં ખુલતા અન્ય સંડોવાયેલા લોકોની ધરપકડ માટે ગુજરાત સહિત દેશના વિવિધ સ્થળોએ ટીમો મોકલવામાં આવી છે.

મેથેનોલયુક્ત ડુપ્લિકેટ દારૂનો મામલો માત્ર નકલી દારૂનો કિસ્સો નહીં, પરંતુ લોકોના જીવ સાથે ચેડા કરતો ગંભીર ગુનો બની સામે આવ્યો છે. હવે તપાસનો દોર ગુજરાત બહાર સુધી પહોંચ્યો છે અને બાકીના આરોપીઓ સુધી SMC ક્યારે પહોંચે છે તેના પર સૌની નજર છે.